El Evangelio y la homilía de este martes en guaraní

Infocatolicos | 23 noviembre, 2010 | Comentarios (0)

Por Pa’i Alberto Luna, SJ (Pa’i Jasy)

ÑANDE HA’E TUPAO HESU OIKOHA.

Clic aquí para escuchar el Evangelio y la homilía de este Martes XXXIV, en guaraní.

Martes XXXIV TO Lucas 21, 5 – 9

Heta oguerohory pe Tupao guasu ita hepýva ha kuave’ẽmby oñeme’ẽva Tupãme rehe oñembojeguáva, Jesús he’i:

–Opa mba’e pehechávagui, oguahẽta ára ndopyta mo’ãiha peteĩ itánte jepe ojo’ári. Oñehundipaitéta.

Aipórõ oporandu chupe hikuái:

–Mbo’ehára, mba’éicha piko rohecha kuaáta oguahẽmaha ára oiko potaha umi eréva?

Jesús he’i: “Pema’ẽ porãke. Aníke peheja avave pene mbotavy. Cháke oĩta heta oúva che rérape. He’íta hikuái: ‘Che ha’e upe Cristo’, ha ‘Oguahẽma ára’. Ha peẽke ani peho hapykuéri kuéra. Pehendúta oikoha ñorãirõ guasu opa rupi. Anínte peñemondýi. Umíva umi mba’e niko ojehu raẽ vaerã voínte, upéva jepe nde’iséi oguahẽmaha pe ára paha”. Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Oĩ ningo umi tupao guasu, tuicháva, jahecháva táva guasúpe, catedral kuéra, oime tupao porã porã overapáva, oime avei ñande tupao guasu Caacupé, hi’aguĩmava hina hi’ára, tuicha, ijyvate, mombyrýgui jahecháva. Santuario nacional ñahenóiva, heta oñemba’apo va’ekue hese oñemopu’ã haguã, heta ro’y ohasa opa mboyve, oñemopu’ã mbeguekatu va’ekue opyta haguã oĩ háicha ko’ãga.

Ha upépe jaháramo niko jahecha ramo pe tupao guasu, umi okẽ tuicha tuicháva, ovetã yvate ha’angapáva, ha upe ijapyra apu’a yvate. Ha upe hi’árape katu ndaikatúi jaipapa umi ijatýva upépe, heta hénte, oguahẽva oñembo’e, promeséro kuéra ou ha ohóva, líñore ndosóiva oguatáva ára ha pyhare, ndaijapáiva tupaópe, omyataindýva okápe, opaichagua jahecha ijerére.

Upéicha va’ekue avei Hesu retãme, amo Israélpe, upe tupao guasu Jerusalénpe, hi’ára oguahẽvove henyhẽ, opaguio oúva oñembo’e, oikuave’ẽ Ñandejárape hymba terã iñemitỹngue, ou ha ohóva, ohecha ramóva umi ita guasu hepývagui ojejapoha ha oñembojegua porã lája.

Hesu he’i chupe kuéra ani haguã omboguapy ijerovia umíva ári, ndaha’éigui umi ita guasu térã jeguaka vera upe ombopyahútava hekove kuéra térã omboguata porãtava upe tetãme. Hesu he’i opa umi mba’e ohasa va’erãha, ha he’i ñandéve ani jaikoiterei umíva rapykuéri ha ñande resarái Ñandejáragui. Ani jajepy’apy eterei ñamoporã ñande tupao ape ha ikangy ñande jerovia Hesúre, okañy ñande rekovépe tekojoja, ha itapykue ñande hegui mboriahu rayhu.