El Evangelio y la homilía de este martes en guaraní

Infocatolicos | 24 agosto, 2010 | Comentarios (0)

Por Pa’i Alberto Luna, SJ

ÑANDE PY’A IPOTÎ RAMO IPORÂ, ÑANDE APE CHALAIMI RAMO JEPE.
PA’I JASY.

Clic aquí para escuchar el Evangelio y la homilía de este martes, en guaraní.

Martes XXI TO Mateo 23, 23 – 26

23 Upérõ Jesús he’i 23 Pejererekóke peẽ Moisés rembiapoukapy mbo’eha ha peẽ fariseo kuéra rova mokõi! Peẽ peme’ẽ Tupãme 10gui peteĩ pene ménta, anís ha komíno jepe. Upéi katu pende resarái Tupã rembiapoukapy pene mbo’eha pende reko joja vaerãha, peporoporiahurereko vaerãha ha pejerovia vaerãha Tupãre. Ko’ãva raẽvete pejapo vaerã ha upéi katu umi ambue. 24 Peẽ myakãhára resatũ, peẽ niko pende ýgui pembogua ñati’ũ ha pemokõ kavaju.

25 Pejererekóke peẽ Moisés rembiapoukapy mbo’eha ha peẽ fariseo kuéra rova mokõi! Peẽ pemopotĩ pende mbayru ha pene ña’ẽmbe ijape guio, hyepy katu henyhẽ umi mba’e pemonda vaekuégui, pene mba’e pota tarovágui. 26 Ehendúke, nde fariseo resatũ. Emopotĩ raẽ ne mbayru ha ne ña’ẽmbe hyepy guio, péicharõ ipotĩne avei ijape guio.

Ñandejára Hesukrísto ñe’ẽ.

ÑAMBOGUEJY KO ÑANDEJÁRA ÑE’Ẽ ÑANDE REKOVÉPE…

Hesu ombohovái umi fariséo kuéra ha Moise rembiapoukapy mbo’ehápe omotenonde haguére Ñandejára rérape heta léi ha tembiapo porã sa’i sa’i ha oheja ojapo’ỹre umi tekotevẽvéva.

Ñande avei ikatu ñaimo’ã ñame’ẽgui plátami hembýva ñandéve tupao peguarã ikatúma japyta py’aguapýpe ha ndajahesa’ói umi ñane rembiapo vai tuicháva, sapy’a ikatu ñaimo’ã jaha haguére Caacupépe térã jaha peteï procesiónpe, térã mísa hápe, térã ñembo’épe ñamboguepámaha ñande pecado…

Umíva niko iporã ha ndajahejái vaerã, opáichavo sapy’ánte umíva ndopokói ñande py’áre, ñande apéguionte ñane mopotĩ, ha Hesu he’i ñandéve jaheja’ỹre umíva jaha pypukuve vaerãha ha jahecha vaerã oimépa ñande jaiko añete tekojojápe ñande rekovépe, ñande rapichándive, ñande komunidápe, ñamba’apohápe, ha opa jaiko hárupi.

Ñama’ẽ vaerã jaikópa jaiporiahuvereko ohasa asývape, mboriahúpe, hasývape, iñembyahýivape, oikotevẽva ao, óga, ekuéla, ha ñañeha’ãpa ñamoirũmínte jepe chupe kuéra…

Ñama’ẽ vaerã noiméipa ñande aho’i upe mba’e pota tarova ha umíva rapykuéri jareko asy ha ñambotapykue ñande rapicha remikotevẽ…

Marãve naiporãmo’ãi ñandéve heta ñembo’e, okañy ramo ñandehegui jerovia añete, poriahuvereko ha tekojoja.