El Evangelio y la homilía del miércoles en guaraní

Infocatolicos | 18 agosto, 2010 | Comentarios (0)

Por Pa’i Alberto Luna, Sj

UMI ITAPYKUÉVAPE OÑEMOTENONDÉTA.
PA’I JASY.

Clic aquí para escuchar el Evangelio y la homilía de este miércoles en guaraní.

Miércoles XX TO Mateo 19, 30 – 20, 16.

Jesús he’i hemimbo’e kuérape, heta umi ko’ágã itenondéva, itapykuéta. Ha heta umi ko’ágã itapykuéva, itenondéta. 1 Ñesãmbyhy yvágagui oúva niko ojogua ku kokue járape osẽva pyharevete ohekávo omba’apo vaerã chupe iparraltýpe.

2 Ha oguahẽ rire peteĩ ñe’ẽme ome’ẽvo chupe kuéra pe viru oñeme’ẽva voínte peteĩ ára oñemba’apo vaekuére, omondo chupe kuéra iparraltýpe. 3 Upéi asajeve, osẽ oho oñeñemuháme ha upépe ojuhu hetã hembiapo’ỹvape. 4 He’i chupe kuéra: “Tapeho peẽ avei pemba’apo che parraltýpe, ha hekoitépe ame’ẽta peẽme viru”. Ha oho hikuái. 5 Pe óga jára osẽ jey asajepyte, ha upéi katu ka’aru asaje rupi, péicha jey ojapo. 6 Ha ka’aruete, osẽ oho jey upe oñeñemuháme ha ojuhu jey upépe hembiapo’ỹvape. Ha he’i chupe kuéra: “Mba’ére piko peẽ peime rei peína ko’ápe ára pukukue pemba’apo’ỹre?” 7 He’i hikuái chupe: “Avave niko na ore momba’apói.” Upérõ he’i chupe kuéra: “Tapeho pemba’apo peẽ avei che yvýpe, ha ame’ẽta peẽme viru hekoitépe.” 8 Ka’aru pytũvo pe óga jára he’i pe iparralty ñangarekohárape: “Ehenói umi omba’apóvape ha eme’ẽ chupe kuéra pe hembiapokue repy. Eñepyrũ umi itapykueve oguahẽ vaekuégui ha ipahávo eme’ẽ umi oike tenondeve vaekuépe.” 9 Ha oguahẽ umi ka’aruete oike vaekue, ha chupe kuéra oñeme’ẽ viru omba’apórõ guáicha peteĩ ára pukukue. 10 Upéi, oguahẽvo umi tenondete oike vaekue, oimo’ã chupe kuéra oñeme’ẽ hetavetaha. Chupe kuéra katu oñeme’ẽ umi ambuépe oñeme’ẽ haguéichante. 11 Oñeme’ẽvo chupe kuéra hembiapokue repy, oñepyrũ ipochy pe óga jára ndive. 12 He’i chupe: “Umi tapykue oike vaekue niko, sapy’amínte omba’apo ha reme’ẽ chupe kuéra oréve reme’ẽháicha, jepe ore ára pukukue romba’apo pe kuarahy akúpe.” 13 Pe óga jára katu he’i chupe kuéra: “Che irũ, ndajapói niko nde rehe mba’eve hendape’ỹva. Ndajapytái nga’u piko ra’e remba’apotaha chéve virúre oñeme’ẽva peteĩ ára oñemba’apóvare? 14 Erekóma niko ne rembiapo repykue, tereho nde rógape. Che ame’ẽse ramo pe tapykuete oike vaekuépe ndéve ame’ẽháicha, 15 piko máva he’íta chéve mba’eve, ajapo haguére ajaposéva viru arekóvagui? Nde pochy nga’u piko che ndive, che mba’e porã haguére?” 16 Upéi he’i Jesús: “Ha péicha, umi itenondéva itapykuéta, ha umi itapykuéva itenondéta.”

Ñandejára Hesukrísto ñe’ë.

ÑAMBOGUEJY ÑANDE REKOVÉPE…

Heta tapicha ha opaichagua niko jahecha oĩva oguata Hesu ykére, heta oĩ tuicha háicha omba’apóva ha ome’ẽva hekove oñandúgui Ñandejára ohenóiha chupe kuéra ojeity haguã tembiapópe hendive ñande Iglésiape, oime obispo, pa’i, hermana, katekísta, coordinador, celebrador, diácono, ha heta cristiano porã oñeha’ãva omboguata grupo, komunida, movimiento, organización, parroquia, kapílla…

Oĩ umi ymaite guive oguatáva voínte tupao ha komunidápe, umi apytere lampíno kuete, ha oĩ avei umi oguahẽ ramóva, oñepyrũva oike Hesu rapére ha sa’i gueteri ome’ẽva ijehegui ko tembiapópe… Oĩ itenondéva ha oĩ itapykuéva hina Ñandejára kokuépe…

Ñande niko jahecha heta hendápe, ja’e chupe umi militar ha umi báncope omba’apóva apytépe niko umi ymave guive omba’apóva, ikatupyryvéva ha iñaranduvéva, oñeasende ha ojupive, isueldo porãve ha omandave umi oike ramóvagui…

Hesu he’i ñandéve Ñandejára renondépe ndaha’eiha upéicha, upépe ha’e omotenonde umi oñepyrũ ramóvape, ha ipahápe ohechakuaa umi ymaite guivéma voi oikóva omba’apo hendive ikokuépe. Ha opavavépe ha’e ombojoja ha ome’ẽ pe tembiapo repykue peteĩchapa… Ñandejára renondépe ndaipóri pa’i terã obispo, ndaipóri hermana téra animador yma guare oñemotenonde vaerãva avaveichagua cristianogui oñeha’ãva ojapo Ñandejára rembipota ipy’aite guive, jepeve ramo oñepyrũ ramo ha sa’i gueteri oka’api Ñandejára kokuépe.

Hesu ñanembo’e ko’ápe tekotevẽha ñande avei ñamotenonde umi ñande rapicha oike ramóvape oguata Hesu rapére, umívape ñamokyre’ỹ ha jahecha ramo, ikatu haguãicha oñandu jaguerohoryha upe ojapóva, michĩ ramo jepe, ani ñaimo’ã upéva ndovaléiha… Upe he’iséva niko jajeity ñande py’aite guive tuicha jerovia reheve jajapo upe Ñandejára ojeruréva ñandéve, ha upe ñande katu hapeve jajapo ramo upéva ha’e ochakuaata ñandéve ha oñemyengovia renyhẽta…